
Flater 1: Leer vind net by die skool plaas
Met nuwe leerbestuurstelsels (“learning management systems – LMS”) soos Die Wolkskool, Google Classroom of selfs Whatsapp kan leerders op enige tyd, vanaf enige plek teen hul eie pas deur leerinhoud werk. Selfgerigte leer word daarmee aangemoedig en bevorder en dit is dan ook ‘n kritieke vaardigheid wat leerders nodig het vir hierdie 21ste eeu.

Flater 2: Die onderwyser is die enigste bron van inligting
“’n Goeie onderwyser is meer werd as ʼn kruiwa vol boeke.” – Chinese spreekwoord

Nie net is ‘n LMS tot voordeel van leerders nie, maar veral tot voordeel van onderwysers. Die grootste impak wat ʼn leerbestuurstelsel (LMS) kan hê, is om die rol van die onderwyser te help verander. Leerders kan deesdae enigiets aanlyn leer, maar dit beteken beslis nie dat onderwysers nie meer nodig is nie. Inteendeel, die rol van die onderwyser is nou belangriker as óóit.
Terwyl tegnologie ‘n magdom (kruiwaens vol) inligting in ‘n hoogs gekonnekteerde wêreld ontsluit, val die klem van onderrig nou op die ontwikkeling van vaardighede (soos selfgerigte leer) eerder as op die blote oordrag van kennis.
Ons bevind ons tans in die 4de Industriële Revolusie waarin daar voortdurend nuwe vaardighede vereis word. Vaardighede (en beroepe) wat vandag in aanvraag is, kan binne vyf jaar verouderd wees. Die nuwe industrie het dus mense nodig met kernvaardighede wat maklik by verandering aanpas.
Net soos wat ouers hulle kinders grootmaak om selfstandig en selfversekerde wyse ʼn positiewe bydrae tot die samelewing te kan maak, is die taak van die onderwyser nou om leerders te bemagtig om nuwe, kritieke vaardighede wat deur die toenemend veranderende wêreld vereis word, self aan te leer.
Flater 3: Tegnologie kan onderwysers vervang
“Tegnologie kan nie onderwysers vervang nie, maar onderwysers wat tegnologie gebruik,
sal diegene wat dit nie gebruik nie, vervang.” – Ray Clifford
Om leerders te motiveer en te mentor, vorm ʼn groot deel van ʼn onderwyser se nuwe mandaat sodat leerders selfgerig kan leer. Hiérdie uiters belangrike rol kan nie maklik deur tegnologie vervang word nie.
Tegnologiese vaardighede van onderwysers speel ‘n belangrike rol, maar dit beteken beslis nie dat hulle nou ewe skielik programmeerders van platforms moet word nie. Hulle moet eerder kennis neem van al die funksionaliteite wat aanlyn leerplatforms bied om dit konstruktief in hul onderrig te kan aanwend. Konstruktief in dié sin dat dit dan aan onderwysers groter kapasiteit vir een-tot-een interaksies met leerders (mentorskap) bied sodat leerders vaardig kan word in selfgerigte leer. Daardeur staan leerders ʼn groter kans om hulle volle potensiaal in ‘n komplekse wêreld te kan bereik. Draai die drie flaters nek om!